Guðlaugur Victor Pálsson lék allan leikinn og bar fyrirliðaband Schalke í 0-1 sigri gegn Hannover í þýsku B-deildinni í dag. Hann lagði upp sigurmarkið seint í uppbótartíma.
Schalke er eftir leikinn í þriðja sæti með 19 stig eftir tíu leiki, stigi á eftir umspilssæti um þátttökurétt í efstu deild að ári.
Guðlaugur Victor hefur verið mikið á milli tannanna á landsmönnum undanfarna daga.
Hann var í landsliðshópi Íslands á dögunum fyrir leiki gegn Armeníu og Liechtenstein. Miðjumaðurinn lék gegn Armenum en dró sig svo úr hópnum fyrir leikinn gegn Liechtenstein.
Arnar Þór Viðarsson, landsliðsþjálfari, virtist alls ekki sáttur með leikmanninn eftir þá ákvörðun.
,,Gulli dró sig út úr hópnum. Hann taldi sig þurfa að fara til síns félags. Þá er hann ekki hér,“ sagði Arnar á fréttamannafundi eftir ákvörðun Guðlaugs Victors.
Hann hélt áfram. ,,Hann taldi fyrir sjálfan sig vera mikilvægara að fara til baka til Schalke frekar en að vera áfram með hópnum fyrir þennan leik.“
„Hvernig brást ég við? Ég sagði að við vildum halda honum, þetta er landsliðsverkefni. Við eigum rétt á leikmönnum, félögin geta ekki þvingað okkur til að skila leikmanni. Ég lét hann vita, við vorum ekki að sleppa honum.“
Eftir fundinn fóru af stað orðrómar um að Guðlaugur Victor gæti verið hættur með landsliðinu. Það á þó eftir að koma nánar í ljós. Næsti landsleikjagluggi fer fram í næsta mánuði.