Því var haldið fram í Dr. Football, hlaðvarpsþættinum í dag að Breiðablik hafi borgað fjórar milljónir fyrir Davíð Örn Atlason bakvörð Víkings í gær.
Valur fékk áhuga á Davíð í upphafi vikunnar og hækkaði það verðmiðann samkvæmt Hjörvari Hafliðasyni.
Þessi 26 ára bakvörður gerði þriggja ára samning við Breiðablik. „Ég er mjög ánægður með að vera kominn til Breiðabliks. Mér líst mjög vel á allar aðstæður og það hlutverk sem mér er ætlað. Ég er búinn að vera lengi í Víkinni og hef átt frábæra tíma þar en fannst vera kominn tími til að breyta til. Einnig er ég sérstaklega ánægður með hvernig félögin stóðu að þessum félagaskiptum. Víkingar eiga miklar þakkir skildar fyrir fagleg vinnubrögð,” sagði Davíð Örn í tilkynningu sem birtist á vefsíðunni blikar.is í gær.
Hjörvar nefndi að sögur væri á kreiki um að Davíð myndi þéna 800 þúsund krónur á mánuði. Launapakkinn hafi orðið stærri þegar Valur var að reyna að fá hann.
„Ég ætla ekki að fullyrða um það en hann er á góðum launum, þar sem Blikunum blæðir mest er launapakkinn. Þetta var komið langt áður en Valur kom í spilið, þetta var komið langt. Börkur (Börkur Edvardsson, formaður Vals) hefur mögulega verið í leikþætti og þar af leiðandi minnkar budgetið hjá Breiðablik,“ sagði Kristján Óli Sigurðsson, sérfræðingur þáttarins.
Ef rétt reynist þá segir Hjörvar. „Tæpar 30 milljónir yfir árin þrjú.,“ sagði Hjörvar.