Arthur miðjumaður Juventus á Ítalíu segir mikinn mun á því að spila með Cristiano Ronaldo og Lionel Messi. Arthur gekk í raðir Juventus frá Barcelona síðasta sumar.
Arthur segir að Ronaldo sé klár í að ræða við alla í klefanum og komi vel fyrir, Messi er lítið fyrir samskipti við liðsfélaga sína.
„Cristiano talar miklu meira við liðsfélaga sína en Messi, hann ræðir við alla í klefanum,“ sagði Arthur.
„Ronaldo er líflegur í klefanum, hann á gott samband við alla. Það hafa allir mismunandi leiðir til að sýna leiðtogahæfileika, Messi lætur verkin tala á vellinum. Hann gerir það með boltanum, hann sýnir viljann til þess að vinna leikinn.“
Arthur segir ótrúlegt að fylgjast með Ronaldo við æfingar. „Hann æfir eins og dýr, hann kann ekki að hvíla sig. Hann leggur áherslu á að allir leggi sig fram.“
„Ronaldo er alltaf að segja mér hvað ég eigi að borða, hann gefur ekki neinn afslátt þar.“