Möguleiki er á því að Lionel Messi, leikmaður Barcelona, hljóti 12 leikja bann fyrir að hafa slegið til leikmanns Athletic Bilbao í Ofubikarnum á Spáni um helgina. Tólf leikja bann er ansi langt en nær engan veginn þeirri lengd sem leikbann Joey Barton var á sínum tíma.
Árið 2017, hlaut Barton, þá sem leikmaður Burnley, 18 mánaða leikbann fyrir brot á veðmálareglum. Bannið var seinna stytt niður í fimm mánuði en Barton var leystur undan samningi hjá Burnley á þeim tíma.
Argentínska knattspyrnugoðsögnin Diego Armando Maradona, hlaut þá 15 mánaða leikbann árið 1994 fyrir notkun ólöglegra lyfja í úrslitakeppni Heimsmeistaramótsins. Bannið markaði endalok Maradona með argentínska landsliðinu.
Eric Cantona, fyrrverandi leikmaður Manchester United, á eitt frægasta dæmið hvað leikbönn varðar. Árið 1995 var Cantona settur í níu mánaða leikbann fyrir að hafa sparkað í stuðningsmann Crystal Palace með kung fu sparki. Auk þess að hafa fengið níu mánaða leikbann, þurfti Cantona að sinna samfélagsvinnu í því sem nemur 120 klukkutíma.