KR hefur ákveðið að hætta málaferlum sínum gegn Knattspyrnusambandi Íslands, málið hófst þegar KSÍ ákvað að hætta leik á Íslandsmótunum í knattspyrnu. Í karlaflokki varð það til þess að KR gat ekki unnið sér inn Evrópusæti á mikla ári, miklir fjármunir voru í húfi þar.
LIðið átti góðan möguleika á Evrópusætinu í gegnum deildarkeppni og þá var liðið í undanúrslitum bikarsins. Kvennalið KR féll svo úr efstu deild þegar KSÍ tók ákvörðunina, liðið var í vondri stöðu en átti enn möguleika á að bjarga sér.
KSÍ hafði farið dómsleiðina hér á Íslandi en ekki haft erindi sem erfiði, félagið ætlaði svo að fara með málið til Alþjóða íþróttadómstólsins, CAS. KR hefur hætt við það.
„Við tókum þá ákvörðun að láta gott heita á þessu stigi. Auðvitað vonumst við til þess að sambandið komi á einhvern hátt til móts við okkur og bæti okkur á einhvern hátt það tjón sem við teljum okkur hafa orðið fyrir. Við væntum þess að eiga góðar viðræður um það,“ sagði Páll Kristjánsson, formaður deildarinnar í þættinum Mín Skoðun en Morgunblaðið segir frá.
Páll segir að kostnaðurinn við málið hjá CAS hafi verið of mikill. „Skjöl og pappírar hlaupa á tugum ef ekki hundruðum blaðsíðna og það þarf að þýða allt á örfáum dögum, til að ganga frá málum gagnvart dómstólnum. Tímaramminn og kostnaðurinn buðu ekki upp á frekari málaferli af okkar hálfu. Við hefðum þurft að skila öllum gögnum í þýðingu innan þriggja daga og borga einhverja 40 þúsund franka. Kostnaðurinn og umfangið í kringum svona mál eru ekki á færi hvers sem er og ekki beint sniðið að íslenskum félagsliðum sem standa í ágreiningi við sambönd eða aðra sambærilega aðila,“ sagði Páll við Valtýr Björn í Mín skoðun.
