Burnley tók á móti Manchester United á heimavelli sínum, Turf Moor í ensku úrvalsdeildinni í gær. Jóhann Berg Guðmundsson, var í byrjunarliði Burnley og spilaði allan leikinn.

Eina mark leiksins kom á 71. mínútu. Það skoraði Paul Pogba eftir stoðsendingu frá Marcus Rashford. Skot Pogba hafði örlitla viðkomu í varnarmanni Burnley sem gerði það að verkum að Nick Pope, markvörður Burnley, kom engum vörnum við. Fleiri mörk voru ekki skoruð í leiknum. Sigur Manchester United lyftir þeim upp í efsta sæti deildarinnar þar er liðið með 36 stig, þremur stigum meira en Liverpool sem situr í 2. sæti.

Í einkunnargjöf enskra blaða fær Jóhann Berg ágætis dóma fyrir frammistöðu sína, Daily Mail gefur honum 6 í einkunn en Independent gefur honum 5 og segir. „Lagði hart að sér eins og við mátti búast en vantaði að skapa eitthvað,“ segir í umfjöllun blaðsins en Burnley var í vörn stærstan hluta leiksins.

Staðarblaðið Burnley Express gefur Jóhanni 6 í einkunn og segir. „Var öflugur í fyrri hálfleik, kom með góðar fyrirgjafir á fjærstöng. Varðist vel og kom sér fyrir aftan boltann til að tryggja að Untied hefði minna pláss. Fór að þreytast í síðari hálfleik og komst lítið inn í leikinn,“ sagði í umfjöllun blaðsins.

Það má teljast nokkuð eðlilegt að Jóhann Berg hafi fundið fyrir þreytu þegar líða tók á leikinn, kantmaðurinn hefur glímt við meiðsli um langt skeið. Leikurinn í gær var sá fyrst í um 16 mánuði þar sem Jóhann Berg spilar allar 90 mínúturnar.

Hann lék síðast 90 mínútur í ensku úrvalsdeildinni í fyrsta leik á síðustu leiktíð, leikurinn fór fram 10 ágúst árið 2019. Síðan þá hefur Jóhann verið inn og út af sjúkrabekknum en mest hafði hann spilað 84 mínútur gegn Everton, 5 október árið 2019.

Jóhann lék rúmar 80 mínútur í enska bikarnum á laugardag og 90 mínútur í gær, hann virðist því vera að komast á fulla ferð en næsti leikur Burnley er um komandi helgi þegar liðið heimsækir West Ham.