Mörg lið hafa áhuga á að fá miðjumanninn Emil Pálsson til liðs við sig, leikmaðurinn er eftirsóttur af liðum á Norðurlöndunum, Mið-Evrópu og á Íslandi. Þetta staðfestir Ólafur Garðarsson, umboðsmaður leikmannsins í samtali við 433.is.
Ólafur staðfestir einnig að þrátt fyrir áhuga íslenskra liða hyggist leikmaðurinn leika áfram erlendis.
Emil var á mála hjá norska úrvalsdeildarliðinu Sandefjord en samningur hans þar rann út um áramótin. Eftir þriggja ára veru hjá félaginu taldi Emil að nú væri rétti tímapunkturinn fyrir sig að breyta um umhverfi.
Emil spilaði 24 leiki af 30 á ný afstöðnu tímabili með Sandefjord sem var nýliði í norsku úrvalsdeildinni. Emil var fyrirliði liðsins í 6 leikjum. Sandefjord endaði í 11. sæti efstu deildar Noregs og afsannaði allar spár um að liðið myndi falla.
Emil er uppalinn hjá BÍ/Bolungarvík frá Ísafirði, hann hefur einnig spilað með FH og Fjölni á sínum ferli. Hann varð Íslandsmeistari í þrígang hjá FH. Árið 2015 var Emil kosinn besti leikmaður ársins í Pepsi-deildinni af leikmönnum deildarinnar. Emil lék þá stórt hlutverk bæði með liði Fjölnis framan af tímabili og síðan með FH þegar leið á tímabilið.
Þá á Emil að baki 1 A-landsleik og 22 landsleiki með yngri landsliðum Íslands, í þeim leikjum hefur hann skorað tvö mörk.