Federico Marchetti, markvörður ítalska liðsins Genoa, bjóst líklegast ekki við því að fá Ferrari bifreið sína til baka í verra ástandi en hann skildi við hana á bílaþvottastöð um daginn. Sú varð hins vegar raunin.
Bíll Marchetti, er af gerðinni Ferrari 812 Superfast og kosta slíkar bifreiðar í kringum 52 milljónir íslenskra króna.
Markvörðurinn hafði skilið við bifreiðina á bílaþvottastöð í borginni og eftir þvott átti starfsmaður stöðvarinnar að keyra bifreiðinni á æfingasvæði Genoa. Það fór ekki betur en svo að starfsmaðurinn keyrði utan í fimm bifreiðar og endaði á vegriði.
Það lítur út fyrir að ökumaðurinn hafi vanmetið kraftinn í bifreiðinni, hámarkshraði hennar er 339 kilómetrar á klukkustund, hann slapp þó ómeiddur.
