Bayern Munchen heimsótti Barcelona og vann auðveldan sigur í Meistaradeild Evrópu í gær Thomas Muller kom gestunum yfir á 34. mínútu með skoti sem hafði viðkomu í Eric Garcia og breytti um stefnu á leið í markið.
Robert Lewandowski tvöfaldaði forystu Bayern á 56. mínútu. Jamal Musiala skaut þá í stöngina og Pólverjinn fylgdi eftir. Lewandowski var aftur á ferðinni með mark á 85. mínútu. Aftur var hann mættur til að fylgja eftir skoti sem fór af stönginni. Serge Gnabry átti það.
Lokatölur 0-3. Afar einfalt fyrir Bayern gegn döpru liði Barcelona.
Joan Laporta forseti Barcelona boðaði alla stjórn félagsins á neyðarfund eftir leik, stóð fundurinn fram eftir nóttu samkvæmt spænskum miðlum.
Það veldur áhyggjum í Katalóníu að Barcelona hafi ekki náð að skjóta einu sinni á mark Bayern. Félagið er í krísu vegna fjárhagsörðugleika og staða Ronald Koeman gæti orðið tæp sem þjálfari innan tíðar.
