Paul Pogba gæti skipt um skoðun hvað varðar framtíð sína hjá Manchester United eftir komu Cristiano Ronaldo til félagsins.

Samningur Pogba við Manchester United rennur út í lok þessa tímabils og hingað til hefur ekki litið út fyrir að hann vilji vera áfram hjá félaginu. Í sumar voru orðrómar um áhuga PSG og Real Madrid á kappanum en bæði lið virtust sátt við að fá hann frekar frítt á næsta ári.

Samkvæmt The Athletic hefur Pogba nú áhuga á að vera áfram og gera nýjan samning við United þökk sé komu Ronaldo í félagsskiptaglugganum. Segir í frétt Athletic að þessi félagsskipti hafi haft mikil áhrif á franska miðjumanninn og hann íhugi nú alvarlega að vera áfram.

Talið er að Manchester United muni bjóða honum nýjan samning á næstu mánuðum. Talið er að Pogba vilji vera áfram ef hann hefur trú á að klúbburinn geti náð árangri á næstu árum og hefur koma Ronaldo áhrif hvað það varðar.