Paris Saint-Germain ætlar að láta það duga að fá Lionel Messi til félagsins, gangi það í gegn. Því mun franska stórveldið ekki fara á eftir Paul Pogba, miðjumanni Manchester United. Le Parisien segir þetta.

Hinn 28 ára gamli Pogba verður samningslaus eftir næsta tímabil. Hingað til hefur hann ekki gert sig líklegan til þess að skrifa undir. Því hefur hann verið orðaður frá Man Utd. PSG hefur einna helst verið nefnt sem hugsanlegur áfangastaður.

Nú virðist þó sem svo að hinn 34 ára gamli Messi sé að ganga til liðs við PSG á frjálsri sölu.

Argentínumaðurinn hefur verið hjá Barcelona frá 13 ára aldri. Félagið hafði hins vegar ekki efni á að gera nýjan samning vegna gríðarlegra fjárhagsvandræða. Leikmaðurinn neyðist því til að fara.

Ásamt því að vera líklega að klófesta Messi hefur PSG fengið leikmenn á borð við Sergio Ramos, Gianluigi Donnarumma, Achraf Hakimi og Gini Wijnaldum í sumar. Pogba mun ekki bætast við þennan hóp.