Lionel Messi grét á blaðamannafundi í gær er hann kvaddi uppeldisfélag sitt, Barcelona. Argentínumaðurinn er líklegur til að fara til PSG á frjálsri sölu en kappinn sagði að ekki væri búið að ákveða neitt. Búist var við að hann myndi endurnýja samning sinn við Barcelona í sumar en félagið er í fjárhagskröggum og gat ekki samið við Messi.
„Ég og fjöldskyldan mín vorum sannfærð um að við myndum vera hérna áfram, heima,“ sagði hann á blaðamannafundi á sunnudaginn.
Búist er við að Messi skrifi undir hjá PSG á allra næstu dögum en launin hans þar verða ekkert slor. Messi mun þéna 25 milljónir evra á tímabili sem gerir 3,7 milljarða íslenskra króna. Búist er við að hann geri tveggja ára samning.
Neymar fyrrum liðsfélagi Messi hjá Barcelona hefur boðið honum að fá treyju númer 10 í París, Neymar vill ólmur fá sinn gamla vin til Parísar. Messi hefur hins vegar afþakkað það boð samkvæmt frönskum fjölmiðlum.
Þar segir að Messi vilji ekki taka treyjuna af Neymar og fari frekar í treyju númer 19, það númer notaði hann til að byrja með hjá Barcelona.
