Cristiano Ronaldo vill yfirgefa Juventus og fara aftur til Real Madrid eða jafnvel PSG samkvæmt fréttum AS.
Ronaldo sneri aftur í herbúðir Juventus á mánudag eftir stutt sumarfrí að loknu Evrópumótinu í knattspyrnu. Ítalska félagið býst við að leikmaðurinn verði áfram en nú segja ýmsir fréttamiðlar á Spáni að Ronaldo vilji snúa aftur til Real Madrid.
Hann vill fá að æfa aftur undir stjórn Carlo Ancelotti en hann tók við Madrid eftir síðasta tímabil. Spænska stórveldið er á eftir Kylian Mbappe en ef samningar nást ekki við hann og PSG þá vill Real Madrid semja aftur við Ronaldo sem er goðsögn hjá félaginu.
Ronaldo er markahæsti leikmaður Real Madrid frá upphafi en hann skoraði 450 mörk fyrir liðið í 438 leikjum og vann Meistaradeildina fjórum sinnum.