Samkvæmt frétt Mirror hafa fulltrúar miðjumannsins Saul Niguez hjá Atletico Madrid fengið leyfi til að ræða við Manchester United og Liverpool um hugsanleg félagaskipti leikmannsins til Englands.
Hinn 26 ára gamli Saul er með klásúlu í samningi sínum við Atletico sem segir að hann megi fara fyrir 125 milljónir punda. Spænska félagið gerir sér þó grein fyrir því að það fái ekki neitt nálægt þeirri upphæð fyrir leikmanninn á núverandi markaði. Félagið mun sætta sig við upphæð á bilinu 35-40 milljónir punda.
Man Utd er talið í bílstjórasætinum um Saul en Liverpool er þó vel með í baráttunni.
Leikmaðurinn sjálfur vill ganga frá sínum málum sem fyrst. Hann hefur engan áhuga á því að framtíð hans verði í óvissu þegar nýtt tímabil fer af stað á Englandi og Spáni.