Rio Ferdinand segir að Owen Hargreaves og Michael Carrick séu vanmetnustu leikmenn sem hann lék með á tíma sínum hjá Manchester United.
Hinn 42 ára gamli Ferdinand vann sex Englansmeistaratitla og einn Evrópumeistaratitil á tíma sínum hjá Man Utd. Hargreaves og Carrick voru til að mynda með honum í liðunu sem varð Evrópumeistari árið 2008.
Hargreaves lék með Man Utd á árunum 2007 til 2011 en var mikið meiddur á þeim tíma.
Carrick átti tólf ára feril hjá Man Utd og myndaði um tíma sterka miðju með Paul Scholes.
,,Þegar hann var ekki meiddur var hann (Claude) Makalele síns tíma, hann hafði jafnvel aðeins meira upp á að bjóða en hann. Hann gat lokað á menn auðveldlega. Hann var sá sneggsti í liðinu á tímabili, við fórum í öll hlaupin og þolprófin,“ sagði Ferdinand um Hargreaves.
,,Hann var áræðinn og óaðfinnanlegur tæknilega. Þegar ég kallaði á hann úr vörninni var hann eins og hermaður. Það sama á við um Michael Carrick. Þeir vissu hvað það var mikilvægt fyrir liðið.“
,,Fólk segir að Michael Carrick hafi aldrei farið í tæklingar en hann þurfti þess oft ekki. Hann las leikinn svo vel, ég stýrði honum líka úr vörninni, sagði honum hvar hann ætti að vera.“
