Þjálfarinn Maurico Pochettino hefur skrifað undir nýjan samning við Paris Saint-Germain, en þetta kemur fram á heimasíðu félagsins. Argentínumaðurinn var áður samningsbundinn félaginu til 2022 en hefur nú framlengt um eitt ár til viðbótar. Pochettino kom til PSG á síðustu leiktíð og varð franskur bikarmeistari og franskur ofurbikarmeistari með félaginu en tókst ekki að hreppa fjórða deildartitilinn í röð en liðið endaði í 2. sæti, einu stigi á eftir meisturum í Lille.
Pochettino vonast eftir frekari árangri á næsta tímabili. „Ég er mjög ánægður. Bæði fyrir mína hönd og þjálfarateymisins. Ég held að það sé mjög mikilvægt fyrir okkur að finna fyrir stuðningi frá félaginu og að sjálfsögðu vil ég þakka forsetanum Nasser, Leonardo og Paris Saint-Germain fyrir traustið. Við vonumst til að afreka margt, vinna titla og allt sem okkur dreymir um,“ sagði Pochettino.
Nasser Al-Khelaifi bætti við: ,,Við erum í skýjunum með að Mauricio sé búinn að skuldbinda sig við Paris Saint-Germain fjölskylduna. Hann var fyrirliði félagsins fyrir 20 árum síðan og gerir sér grein fyrir metnaði okkar, gildum og framtíðarsýn. Við erum spenntir að sjá hvað framtíðin ber í skauti sér.“