Aleksander Ceferin, forseti UEFA, segir að hann muni aldrei styðja það að Evrópumót í knattpsyrnu yrði haldið um alla álfuna á nýjan leik.

EM sem nú stendur yfir hefur farið fram í ellefu löndum, allt frá Danmörku til Aserbaídjan. Það hefur verið erfitt fyrir marga stuðningsmenn að ferðast. Ekki aðeins vegna langra vegalenda, heldur einnig vegna kórónuveirufaraldursins og mismunandi takmarkanna í löndunum ellefu vegna hans.

Þá hafa sumir stuðningsmenn og leikmenn sumra landa þurft að ferðast mun meira en aðrir. Enska landsliðið og stuðningsmenn þeirra hafa til að mynda aðeins þurft að ferðast frá Englandi í einn leik, aðrir mun meira.

,,Þetta er ekki sanngjarnt fyrir stuðningsmenn sem þurftu að vera í Róm einn daginn og Bakú stuttu síðar,“ sagði Ceferin við BBC. 

Hann sagði einnig að það væri erfitt hversu mismunandi löndin væru, hvað varðar lög og fleira.

,,Við þurftum að ferðast mikið til mismunandi landa, með mismunandi gjaldmiðla. Sum eru í Evrópusambandinu og önnur ekki. Þetta var ekki auðvelt.“

Michel Platini var forseti UEFA árið 2012. Það var þá sem ákvörðun var tekin um að halda EM um alla Evrópu.

,,Þetta form af keppninni var ákveðið áður en ég kom inn og ég virði það. Þetta er áhugaverð hugmynd en það er erfitt að framfylgja henni. Ég held að við gerum þetta ekki aftur,“ sagði Ceferin að lokum.