Þýska félagið Schalke setti inn skemmtilega færslu á Twitter í dag þar sem félagið reynir að lokka Gareth Bale til sín.

Framtíð Bale hjá Real Madrid er í óvissu. Hann á aðeins ár eftir af samningi sínum við félagið og óvíst er hvað verður um hann.

Í færslu Schalke setti félagið inn yfirlitsmynd af Gelsenkirchen, borginni sem félagið er frá, þar sem mátti sjá stóran golfvöll í miðjunni. Bale er mikill áhugamaður um golf og hefur hann oft farið í taugarnar á stuðningsmönnum Real Madrid fyrir að virðast hafa meiri metnað fyrir golfinu heldur en að standa sig fyrir félagið.

Schalke leikur í þýsku B-deildinni á næstu leiktíð eftir að hafa fallið úr efstu deild. Það skal hafa í huga að félagið á engan veginn efni á því að fá Bale til félagsins. Aðeins er um grín að ræða.

Guðlaugur Victor Pálsson er á mála hjá Schalke. Hann kom til liðsins frá Darmstadt fyrir stuttu eftir að samningur hans þar rann út.

Hér fyrir neðan má sjá færsluna skemmtilegu.

Gelsenkirchen is ready for you, Gareth⛳ https://t.co/SVoQGXkNHa pic.twitter.com/HNbUuuXkKt

— FC Schalke 04 (@s04_en) June 27, 2021