Wales vann gríðarlega mikilvægan sigur á Tyrklandi í öðrum leik dagsins á EM 2020. Leikurinn var liður í A-riðli mótsins. Leikið var í Bakú.
Aaron Ramsey kom Wales verðskuldað yfir á 43. mínútu leiksins eftir góðan undirbúning Gareth Bale. Staðan í hálfleik var 1-0.
Eftir klukkutíma leik fékk Bale svo kjörið tækifæri til að tvöfalda forystu Wales af vítaspuntkinum. Hann skaut þó yfir markið.
Connor Roberts gulltryggði þó sigur þeirra í blálokin með marki eftir sendingu frá títtnefndum Bale.
Wales er nú komið í kjörstöðu í A-riðlinum með 4 stig eftir tvo leiki. Tyrkir eru í slæmum málum, enn án stiga. Ítalía og Sviss leika í kvöld. Fyrrnefnda liðið hefur 3 stig og það síðarnefnda eitt. Þau hafa þó aðeins leikið einn leik á mótinu.
