Cesc Fabregas, miðjumaður AS Monaco, gat ekki valið á milli Xavi eða Andres Iniesta er hann var beðinn um það. Leikmaðurinn bauð aðdáendum að spyrja sig spurninga á Twitter í dag.

Fabregas, sem hefur einnig leikið með Arsenal, Barcelona og Chelsea á ferlinum var spurður af aðdáenda hvort að hann gæti valið á milli Xavi eða Iniesta. Spánverjinn svaraði einfaldlega ,,mamma eða pabbi?“ Þar með gaf hann í skyn að hann gæti ekki valið á milli leikmannana frekar en á milli foreldra sinna.

Fabregas lék með þessum frábæru miðjumönnum hjá Barcelona og með spænska landsliðinu. Saman urðu þeir til að mynda heims- og Evrópumeistarar.

Xavi er í dag knattspyrnustjóri Al Sadd í Katar. Iniesta er enn að spila knattspyrnu. Hann leikur með Vissel Kobe í Japan.