Samkvæmt fréttum í Danmörku var Arnar Þór Viðarsson landsliðsþjálfari Íslands á dögunum í viðræðum við OB um að taka við þjálfun liðsins.
Frá þessu segir Sport Fyn og Tipsbladet. Þar segir að Arnar hafi komið til greina sem þjálfari liðsins og viðræður hafi átt sér stað.
Að lokum var það Andreas Alm sem tók starfið að sér en hann tekur við starfinu 18 júní. Aron Elís Þrándarson og Sveinn Aron Guðjohnsen leika með OB.
Í fréttum í Danmörku segir að það hafi komið til tals að Arnar myndi stýra bæði OB og íslenska landsliðinu en Jens Gustafsson frá Svíþjóð er einnig sagður hafa verið í viðræðum um starfið.
Arnar Þór gerðist landsliðsþjálfari undir lok síðasta árs en hann ásamt Eiði Smára Guðjohnsen og Lars Lagerback velja í dag hóp sinn fyrir komandi æfingaleiki.