Knattspyrnudeild Fram hefur samið við leikmanninn Danny Guthrie og mun hann leika með Fram í Lengjudeildinni á komandi tímabili.

Danny, sem er 34 ára, er mjög reyndur miðjumaður sem hefur leikið yfir 100 leiki í ensku úrvalsdeildinni og um 150 leiki í Championship deildinni. Hann hóf atvinnumannaferil sinn með Liverpool en er sennilega þekktastur fyrir tíma sinn hjá Newcastle og Reading.

Von er á honum til landsins í vikunni þar sem hann fer í sóttkví og hefur svo æfingar með Fram. „Þetta mál kom óvænt upp á borð hjá okkur og þótti okkur þetta vera mjög spennandi kostur. Það var erfitt að sleppa þessu tækifæri og við vonumst til að hann með sína reynslu og karakter komi sterkur inn í öflugan hóp. Ég efast ekki um að hann muni ýta mönnum upp á tærnar og vera góð viðbót við gott lið. FRAMtíðin mun leiða það í ljós,“ sagði Jón Sveinsson þjálfari Fram um málið.

„Ég er mjög ánægður með að ganga í raðir Fram, félagið með frábæra sögu. Ég get ekki beðið eftir því að koma itl Íslands og hitta þjálfarana og liðsfélaga mína. Ég ætla að leggja mikið á mig til að komast í form, spila leiki og vinna þá,“ sagði Guthire.

Guthire lék síðast með Walsall í neðri deildum Englands. Hann ólst upp hjá Manchester United en fór til Liverpool 15 ára gamall árið 2002.