Sjónvarpsþáttur 433 verður á dagskrá Hringbrautar í kvöld klukkan 21:30 en þátturinn verður sýndur á sama tíma á vefnum.

Í þætti kvöldsins verður Guðni Bergsson formaður KSÍ til viðtals, hann ræðir COVID málefni fótboltans og hvað sambandið hefur gert til að vinna fyrir hagsmuni hreyfingarinnar. Guðni ræðir málefni landsliðanna sem hafa verið í eldlínunni síðustu vikur.

Í þættinum er farið yfir málefni kvennalandsliðsins en það vakti athygli á dögunum þegar Jón Þór Hauksson, fyrrum þjálfari liðsins sagðist vera ósáttur við margt í viðskilnaði sínum við KSÍ. Jón Þór vék úr starfi í desember eftir miður skemmtilega uppákomu í fögnuði liðsins í Ungverjalandi í. Þjálfarinn, starfsfólk KSÍ og leikmenn voru þá að sletta úr klaufunum eftir að stelpurnar höfðu tryggt sig inn á Evrópumótið í Englandi.

Jón Þór sagðist ósáttur en vildi ekki fara nánar út í málið, hálfkveðnar vísur sem skilja eftir spurningar.

Guðni segist ekki vita hvað Jón Þór sé ósáttur með. „Ég held að hann hafi ekki minnst á það sjálfur, ég held að það sé best að þessu máli var lokið. Hann sagði sínu starfi lausu, þetta voru leiðinleg málalok fyrir hann og KSÍ. Þetta var sorglegt mál að þurfa að takast á við, við gerðum það í sameiningu,“ sagði Guðni.

Guðni vill horfa til þess að Jón Þór náði góðum árangri í starfi frekar en þetta mál. „Það náðist góður árangur, ég vil að við einbeitum á það. Þetta er liðið.“

En finnst Guðna ekki furðulegt að Jón Þór fari fram með hálfkveðnar vísur svona löngu eftir að málinu var lokið? „Hann verður að svara fyrir það, ég ætla ekki að tjá mig um það.“

Eins og fyrr segir verður viðtalið við Guðna klukkan 21:30 í kvöld á Hringbraut og á vefnum.