Íslenska landsliðið mun í næstu viku hefja leik í undankeppni Heimsmeistaramótsins, liðið byrjar á leik gegn Þýskalandi og mætir síðan Armeníu og Liechtenstein.

Ísland gæti þá verið án Gylfa Þórs Sigurðssonar, Jóhanns Bergs Guðmundssonar, Jóns Daða Böðvarssonar og Rúnars Alex Rúnarssonar í leiknum gegn Þýskalandi. Ástæðan eru reglur er varðar COVID-19, ekki er komið á hreint hvort leikmönnum frá Englandi verði hleypt inn í landið og eða félögin hleypi þeim í verkefnið.

FIFA gefur félögum grænt ljós á að banna leikmönnum að fara í verkefni, þurfi þeir að fara í sóttkví við heimkomu. Ljóst er að það væri mikið högg fyrir Ísland að vera án Gylfa, Jóhanns og Jóns Daða sem allir hafa spilað stórt hlutverk í liðinu síðustu ár.

Arnar Þór Viðarsson, Eiður Smári Guðjohnsen og Lars Lagerback munu opinbera sinn fyrsta landsliðshóp á miðvikudag. Lagerback sem stýrði íslenska landsliðinu frá 2011 til 2016 hefur enn ekki hitt Arnar og Eið, þeir hafa fundað í gegnum fjarfundarbúnað en ekki náð að hittast vegna veirunnar.

Lagerback mun koma saman við leikmannahóp Íslands í Þýskalandi í upphafi næstu viku, en nýtt þjálfarateymi fær þrjár æfingar fyrir fyrsta leik sinn. Stærstur hluti af þeim leikmönnum sem Lagerback var með í sínum landsliðshópi eru til taks fyrir utan Eið Smára sem nú er í þjálfarateyminu.