Rio Ferdinand fyrrum varnarmaður Manchester United sagði félaginu að kaupa Ben Godfrey frá Norwich fyrir tveimur árum. United hlustaði ekki og Everton stökk til og keypti hann síðasta sumar.

Godfrey er 23 ára varnarmaður sem hefur slegið í gegn hjá Everton og verið einn besti leikmaður liðsins á þessu tímabili.

Godfrey kostaði 25 milljónir punda en Rio Ferdinand á umboðsskrifstofuna sem sér um málefni Godfrey. Varnarmaðurinn er fjölhæfur og getur leikið sem bakvörður og miðvörður.

„Það áttu allir möguleika á að kaupa hann því Norwich var tilbúið að selja hann,“ sagði Ferdinand og lét vita að hann hefði ráðlagt Manchester United að taka hann.

Ferdinand telur að stutt sé í að Godfrey verði kallaður inn í enska landsliðið. „Ef Southgate er að horfa þá er hann að gera þetta rétt, en hann þarf ekki nein ráð frá mér.“

„Það er skemmtilegt fyrir stjóra að horfa á Godfrey þessa dagana. Hann hefur verið mjög öflugur, og staðið sig vel í þeim aðstæðum sem hann hefur verið settur í.“

Enski boltinn á 433 er í boði