Arséne Wenger, fyrrverandi knattspyrnustjóri Arsenal var í ítarlegu viðtali við 11freunde á dögunum. Í viðtalinu er farið yfir feril Wenger sem knattspyrnustjóri.
Ein umdeildustu félagsskipti á knattspyrnustjóraferli Wenger hjá Arsenal áttu sér stað þegar að varnarmaðurinn Sol Campbell gekk til liðs við Arsenal frá erkifjendunum í Tottenham.
Forráðamönnum Arsenal tókst að halda félagsskiptunum leyndum alveg fram að blaðamannafundi þar sem Sol var tilkynntur sem leikmaður Arsenal. Það olli reiði, sérstaklega hjá stuðningsmönnum Tottenham.
„Ég vissi að félagsskiptin yrðu umdeild í Lundúnum, en ég var handviss um að ég vildi leikmanninn. Ég taldi að hann gæti yfirstigið mótlætið sem fylgdi félagsskiptunum. Þetta var auðvelt fyrir mig því allir vissu að ég hefði samið við góðan leikmann. Fyrir hann var þetta flóknara,“ sagði Wenger um félagsskipti Sol Campbell.
Leikmenn Arsenal á þessum tíma búuðu á Sol Campbell þegar hann mætti fyrst á æfingar með liðinu. Það var gert til þess að venja hann við því mótlæti sem hann gæti mætt frá stuðningsmönnum.
„Þetta var stressandi tímabil fyrir Sol og hann átti seinna eftir að greina mér frá því hversu alvarlegt þetta var í raun og veru. Hann gat ekki farið á ákveðna staði í London án þess að vera áreittur af stuðningsmönnum Tottenham. Ef ég hefði vitað þetta fyrirfram er ég ekki viss um að ég hefði tekið þá ákvörðun að fá hann til Arsenal, “ sagði Arséne Wenger, fyrrverandi knattspyrnustjóri Arsenal.