Ingibjörg Ólafsdóttir hótelstjóri á Hótel Sögu hafnar því að starfsmaður hjá sér hafi tekið við greiðslu frá Phil Foden og MAson Greenwood. Ingibjörg fullyrðir þetta í samtali við Vísir.is.
Starfsmaður á Hótel Sögu er borinn þungum sökum í enskum blöðum í dag, hann er sagður hafa tekið við greiðslu frá Phil Foden og Mason Greenwood síðasta sunnudag. Hótel-starfsmaðurinn er sagður hafa hjálpað ensku landsliðsmönnunum við að brjóta reglur um sóttvarnir þegar þeir hittu tvær íslenskar stúlkur. Enska landsliðið dvaldi á hótelinu á meðan liðið var á Íslandi.
Í fréttum enskra blaða var sagt að starfsmaðurinn hefði tekið við greiðslu til að hjálpa íslensku stúlkunum að komast inn á Hótel Sögu. ,,Drengirnir borguðu hótelstarfsmanni til að lauma stúlkunum inn á hótelið þrátt fyrir strangar sóttvarnarreglur,“ segir í frétt Daily Mail. The Sun hefur sömu sögu að segja.
Meira:
Starfsmaður Hótel Sögu borinn þungum sökum í enskum blöðum
Ingibjörg segir þetta ekki rétt, enginn starfsmaður hafi tekið við greiðslu. „Þetta er ekki rétt. Ég segi ekki meira. En enska landsliðið veit að þetta er ekki rétt,“ segir Ingibjörg við Vísir.is.
Hún vill hins vegar ekki segja frá því hvernig stelpurnar komust inn á hótelið en enska landsliðið mátti ekki hitta aðra einstaklinga. Með því brutu þeir félagar sóttvarnareglur. „Það er trúnaðarmál, hvernig þær komust inn. Við höldum trúnað við gestina okkar, sama hverjir þeir eru,“ segir Ingibjörg við Vísir.is.
