Kári Árnason verður fyrirliði íslenska landsliðsins gegn Englandi á morgun þegar liðin mætast á Laugardalsvelli í Þjóðadeildinni.

Allir leikmenn Íslands eru leikfærir en eins og fjallað hefur verið um vantar marga lykilmenn fyrir þennan stórleik. Jóhann Berg Guðmundsson, Gylfi Þór Sigurðsson og Alfreð Finnbogason gáfu ekki kost á sér. Aroni Einari Gunnarssyni var bannað að ferðast frá Katar og Ragnar Sigurðsson hefur glímt við meiðsli.

Íslenska liðið er læst inni á hóteli vegna kórónuveirunnar en iðulega geta leikmenn farið af hótelinu í verkefni. „Þetta er í rauninni ekkert öðruvísi, við höfum verið með frítíma í öðrum verkefnum. Þegar öllu er á botninn hvolft þá eru menn bara að einbeita sér að næsta leik,“ sagði Kári á fréttamannafundi í dag.

Þrátt fyrir mörg ný andlit í hópnum er Kári sáttur með gang mála. „Stemmningin er mjög góður, eins og alltaf. Það kemur bara maður í manns stað og þetta er tækifæri fyrir unga leikmenn að festa sig í sessi.“

Ísland og England áttust síðast við árið 2016 þegar Ísland vann sinn fræknasta sigur á Evrópumótinu í Frakkland. ,,Þetta er allt annað enskt lið í raun, þó þeir hafi nokkra leikmenn sem voru þar. Sterling er eldri og betri og sama gildir um Harry Kane. Þetta er yngra lið, meiri hraði en var 2016. Framlína þeirra er á heimsmælikvaraða, við treystum okkur í þetta verkefni.“

Eins og fyrr segir vantar lykilmenn en Kári segir að ekki sé hægt að dvelja við það. „Ég er alltaf svekktur þegar það eru leikmenn sem komast ekki, við erum ekki það heppnir að geta valið úr endalaust af leikmönnum. Það er svekkjandi en öll þessi tilfelli eru mismunandi. Ég get ekki alhæft um það af hverju menn ákváðu að koma ekki. Þetta er klisja en aðrir verða að horfa á þetta sem tækifæri til að festa sig í sessi, það er kominn tími á það.“