Rúnar Alex er mættur til æfinga hjá Arsenal en hann gekk til liðs við félagið í gær á fjögurra ára samningi. Arsenal hefur nú birt myndir á samfélagsmiðlinum Twitter þar sem sjá má Rúnar Alex á æfingasvæði félagsins í London Colney.

Næsti leikur Arsenal er á miðvikudaginn á útivelli gegn Leicester City í enska deildarbikarnum. Möguleiki er á því að Rúnar Alex leiki sinn fyrsta leik fyrir félagið þá.

Ensk blöð eru nú byrjuð að grafa upp allt sem finna má um Rúnar Alex, þegar leikmaður gengur til liðs við eitt af stærri liðum Englands vill fólk fá að vita sem mest.

Markvörður fyrir tilviljun:
Enska götublaðið The Sun er byrjað að fjalla um Rúnar og segja að hann hafi orðið markvörður fyrir hálfgerða tilviljun. „Það síðasta sem var í huga hans þegar Rúnar var tíu ára gamall var að gerast markvörður,“ segir í grein The Sun.

Þar segir að Rúnar hafi verið efnilegur útispilari en í honum hafi sprungið botnlangi  og hann hafi þurft að fara í bráðaskurðaðgerð vegna þess. Hann fór í fótbolta fimm mánuðum síðar og tók upp hanskana ef marka má ensk blaðið.

Fótboltinn var í blóði hans:
Eins og við mátti búast fer The Sun yfir hver faðir Rúnars Alex er, sjálfur Rúnar Kristinsson. Rúnar er leikjahæsti leikmaður í sögu íslenska landsliðsins og átti frábæran feril í atvinnumennsku. Rúnar Alex ólst upp í Belgíu þar sem faðir hans lék sem atvinnumaður „Það undirbjó mig ágætlega undir ferill minn sem atvinnumaður,“ sagði Rúnar Alex um málið.

Góðgerðarstarf og unnustan vekur athygli
The Sun fjallar um það að Rúnar Alex sé einn af þeim knattspyrnumönnum sem tekur þátt í Common Goal þar sem leikmenn gefa eitt prósent af launum sínum í góðgerðarstarf. „Ég man eftir því úr æsku minni að mamma og pabbi voru að hjálpa fólki, stundum voru það bara litlir hlutir,“ sagði Rúnar um málið.

Ásdís Björk Sigurðardóttir unnusta Rúnar er svo einnig til umfjöllunar og segir meðal annars í fyrirsögn The Sun að hún sé „glamourous Wag“.