,,Ég er gríðarlega ánægður og stoltur. Þetta er stór dagur fyrir mig og fjölskyldu mína. Ég get ekki beðið eftir því að byrja,“ sagði Rúnar Alex Rúnarsson við heimasíðu Arsenal eftir að hafa skrifað undir samning við þetta enska stórveldi.
Arsenal staðfestir að Rúnar muni leika í treyju númer 13 en hann gerir fjögurra ára samning með möguleika á fimmta árinu.
„Þetta er eitt stærsta félag í heimi, þeir hafa unnið deildina 13 sinnum og enska bikarinn 14 sinnum. Þetta er mjög stórt félag og að spila í ensku úrvalsdeildinni, þetta er sigur fyrir mig á alla vegu.“
Rúnar er 25 ára gamall og kemur frá franska liðinu Dijon. „Ég veit að ég þarf að leggja mikið á mig, ég er klár í að gera allt til þess að spila eins margar mínútur og möguleiki er á.“
Inaki Cana markmannsþjálfari Arsenal vann með Rúnari hjá danska liðinu Nordsjælland. „Okkar samband hefur verið gott, við höfum alltaf haldið sambandi. Ég spilaði í Frakklandi en hann þjálfaði á Englandsi.“
,,Það er mjög mikilvægt fyrir mig að þekkja einhvern hérna þegar ég kem hingað. Hann þekkir mína styrkleika, hann veit hvað ég þarf að bæta og hvað ég get gefið félaginu. Það er gott að hitta hann aftur.“