A landslið karla hefur hafið undirbúning sinn fyrir leikinn við England í A-deild Þjóðadeildar UEFA, sem fram fer næstkomandi laugardag á Laugardalsvelli. Æft var mánudag og þriðjudag við toppaðstæður og leikflötur vallarins skartar sínu fegursta.
Um er að ræða fyrsta leik liðanna í þessari keppni, en Ísland mætir einnig Belgíu í þessari leikjalotu á meðan England mætir Danmörku. Enska liðið mun ekki æfa á Laugardalsvellinum fyrir leikinn, en æfir hérlendis eftir leikinn og mun halda til Danmerkur á mánudag. Engir áhorfendur eru leyfðir á UEFA leikjum og því verður áhorfendastúkan í Laugardalnum tóm.
Ísland og England hafa þrisvar sinnum áður mæst í A landsliðum karla og hefur hvort lið um sig unnið einn leik og einu sinni hafa liðin skilið jöfn. Sigur íslenska liðsins á því enska á EM 2016 er knattspyrnuáhugafólki eflaust í fersku minni.
Reglur UEFA kveða á um að áhorfendur geta ekki mætt á völlinn vegna kórónuveirunnar, Laugardalsvöllur verður því tómur eitthvað sem íslenska landsliðið hefur ekki upplifað á heimavelli. Leikur Íslands og Englands fer fram á Laugardalsvelli laugardaginn 5. september og hefst kl. 16:00 (beint á Stöð 2 sport).
Flestir lykilmenn Íslands mæta ekki til leiks þegar liðið mætir Englandi og Belgíu í Þjóðadeildinni. Jóhann Berg Guðmundsson, Alfreð Finnbogason, Gylfi Þór Sigurðsson og Aron Einar Gunnarsson mæta ekki til leiks. Ástæður þeirra eru misjafnar en Jóhann Berg og Alfreð hafa verið meiðslum hrjáðir síðustu ár. Þá er Ragnar Sigurðsson meiddur þessa stundina.