Eldgosið í Eyjafjallajökli árið 2010 er mörgum ferskt í minni. Eldgosinu fylgdu margs konar vandræði. Þar á meðal fóru flugsamgöngur úr skorðum víðsvegar í Evrópu.

Einn af þeim sem átti flug á þessum tíma var þáverandi leikmaður Liverpool, Fernando Torres. Hann átti að hitta skurðlækni í Barcelona vegna hnémeiðsla sem hann hlaut í leik með Liverpool.

Ekki var hægt að fljúga frá Liverpool til Barcelona vegna eldgossins í Eyjafjallajökli. Flugferð sem hefði tekið tæpar tvær og hálfa klukkustund.

Torres var mikið í mun að hitta þennan skurðlækni til þess að fá það á hreint sem fyrst hvort hann þyrfti að fara í aðgerð. Ástæðan var sú að framundan var Heimsmeistaramótið í knattspyrnu og spænska landsliðið var talið sigurstranglegt.

Hann ákvað því að ferðast 1.900 kílómetra vegalengd í bíl. Ferð sem að tók nánast heila helgi.

,,Ég verð að spila á Heimsmeistaramótinu, því ég veit að Spánn getur unnið,“ sagði Torres við skurðlækninn Ramon Cugat.

Þetta er meðal þess sem kemur fram í nýrri heimildarmynd um Fernando Torres sem kemur á steymisveituna Amazon Prime video í dag. Hér fyrir neðan má sjá stiklu úr myndinni.