Liverpool byrjaði leikinn betur og komst liðið yfir eftir að Mohammed Salah skoraði mark úr víti snemma í leiknum. Nýliðarnir svöruðu fyrir sig skömmu síðar en það var Jack Harrison sem jafnaði metin.
Á 20. mínútu skoraði varnarmaðurinn Virgil van Dijk með föstum skalla eftir hornspyrnu. Patrick Bamford náði þó að jafna metin aftur fyrir Leeds, 10 mínútum síðar. Einungis þremur mínútum eftir að Leeds jafnaði náði Salah að skora sitt annað mark og koma Liverpool aftur yfir. Nýliðarnir voru þó ekki búnir að gefast upp og á 66. mínútu náði Mateusz Klich að jafna fyrir Leeds.
Liverpool pressaði mikið eftir þetta og má segja að mark hafi legið í loftinu í langan tíma þegar liðið fékk dæmt annað víti undir lok leiksins. Salah fór aftur á punktinn og skoraði sigurmark leiksins og sitt þriðja mark. Lokaniðurstaðan því 4-3 í stórskemmtilegum leik.