Guðjón er þessa stundina staddur í COVID-19 sóttkví en smit kom upp í liði Víkings í síðustu viku. „Þetta er eins og að vera í fangelsi, það er ekkert annað,“ sagði Guðjón þegar hann var spurður um það hvernig það er að vera í sóttkví.
Guðjón var ósáttur með það að lið megi ekki æfa til 13. ágúst næstkomandi. Þá benti Guðjón á að á Norðurlöndunum megi lið bæði spila og æfa. „Þetta er öfgakennt. Það er æft á Norðurlöndunum og spilað. Það er líka annað, íþróttaæfingar á völlunum eru 105×70 og það er ekki eins og menn séu að knúsast og kyssast á þessum æfingum. Það er meira að segja hægt að hafa æfingar án snertinga og menn þrífa sig og passa sig strax eftir æfingar,“ sagði Guðjón í þættinum. „Það er hægt að æfa með færslum og öðru án þess að snertast. Þú setur hanska á hendurnar og passar þær. Það er misræmi í þessu hjá stjórnvöldum.“
Þá nefndi Guðjón að hann hafi séð mynd úr Leifsstöð og að þar hafi verið mikið af fólki. „Maður sá mynd af troðfullri Leifsstöð og það má ekki vera þannig að það sé hentistefna hvernig hlutirnir eru,“ sagði Guðjón. „Það er ekki skrítið að sumt fólk sé að missa þolinmæðina þar sem aðstæðurnar eru misjafnar. Við erum að bjóða inn fólki frá Noregi, Danmörku og öðrum löndum til Íslands. Þar er verið að spila fótboltaleikina og fólk er að koma frá þessum löndum án þess að fara í skimum og við megum ekki spila fótbolta.“
Guðjón segir einnig frá því þegar hann fór til Akureyrar um daginn. „Þegar ég fór til Akureyrar voru raðir fyrir utan barinn og troðfullt inni. Á sama tíma var verið að spila áhorfendalaust í bikarnum. Það er ekki mikið samræmi í þessu. Fólk sem er fullt, skakkt og hvað eina er ekki að hugsa um tveggja metra regluna. Ef það er einhvers staðar holl starfsemi og áhugi fyrir því að hafa hlutina í lagi er það í íþróttahreyfingunni.“