„Ísland er sjóðandi reitt,“ segir í upphafi fréttar The Sun um málið. Flestir lykilmenn Íslands mæta ekki til leiks þegar liðið mætir Englandi og Belgíu í Þjóðadeildinni. Jóhann Berg Guðmundsson, Alfreð Finnbogason, Gylfi Þór Sigurðsson og Aron Einar Gunnarsson mæta ekki til leiks. Ástæðan er misjöfn en Jóhann Berg og Alfreð hafa verið meiðslum hrjáðir síðustu ár. Þá er Ragnar Sigurðsson meiddur þessa stundina en er að koma til baka.
The Sun greinir frá því sem Erik Hamren, landsliðsþjálfari Íslands, sagði á blaðamannafundinum fyrir leikinn sem haldinn var á föstudaginn. Þar útskýrði Hamren hvers vegna þessir leikmenn eru ekki í hópnum. „Þetta var skrýtin staða fyrir alla, þetta eru leikmenn á mismunandi aldri og mismunandi reynslu. Það eru ekki allir þarna sem ég vildi fá, það voru ekki allir í boði,“ sagði Hamren.
„Alfreð, Jóhann Berg og Gylfi völdu að mæta ekki, þeir hafa verið heiðarlegir við mig hvernig staðan er í þeirra félögum og ástæðu þess að þeir tóku þessa sorglegu ákvörðun. Þeir vilja spila fyrir Ísland og líður ekki vel með þessa ákvörðun, ég er ekki sáttur með þetta en ég verð að taka þessu. Ég neyði leikmenn ekki til að koma og spila, við munum sakna þessara leikmanna. Ég átti ekki von á þessu.“
Hamren vildi ekki ræða ástæður sem leikmenn gáfu upp. ,,Ef ég sé það með þeirra augum þá skil ég þetta, ég ef með gleraugu liðsins, þá er ég ekki sáttur með þessa ákvörðun.“
