Pepsi Max-deildin: Fyrsti sigur Blika síðan í júní - Stuðningsmaður Blika vann góða upphæð

Breiðablik tók á móti ÍA í Kópavoginum í dag. Fyrir leikinn hafði Breiðablik ekki unnið leik síðan í júní.

Svo virðist vera sem Blikarnir hafi verið þreyttir á því að sigra ekki leiki þar sem þeir mættu heldur betur af fullum krafti í leikinn. Alexander Helgi Sigurðarson kom Blikum yfir eftir 11 mínútur og einungis sex mínútum síðar skoraði Kristinn Steindórsson og kom Breiðablik í tveggja marka forystu. Á 37. mínútu skoraði Thomas Mikkelsen þriðja mark Blika og aðeins tveim mínútum síðar skoraði Kristinn aftur og kom Breiðablik í 4-0. Rétt fyrir hlé fékk ÍA vítaspyrnu sem Tryggvi Haraldsson skoraði úr og var staðan í hálfleik 4-1.

Snemma í seinni hálfleik náði Hlynur Jónsson að minnka muninn fyrir Skagamenn en það dugði skammt því stuttu eftir markið fékk Breiðablik víti sem Thomas Mikkelsen skoraði úr. Þrem mínútum eftir það náði Viktor Jónsson hins vegar að minnka muninn aftur fyrir Skagamenn en mörkin urðu ekki fleiri. Lokaniðurstaða því 5-3 fyrir Breiðablik sem eru án efa sáttir með fyrsta sigurinn í langan tíma.

Þá eru það ekki bara leikmenn Breiðabliks sem eru sáttir þessa stundina en Egill Einarsson, stuðningsmaður Blika sem einnig þekktur er sem Gillz, er vafalaust sáttur með sitt lið. Egill lagði tæpar 100 þúsund krónur undir á að Breiðablik myndi vinna leikinn með meira en einu marki. Það gerðist og fékk Egill því tvöfalda upphæðina til baka.