Stórleikur var á dagskrá í efstu deild kvenna í knattspyrnu í kvöld þar sem Breiðablik tekur á móti Val. Fyrir leikinn voru ríkjandi Íslandsmeistarar Vals voru með 16 stig eftir sex leiki. Breiðablik voru með 12 stig eftir fjóra leiki. Leikir þessara liða enduðu báðir með jafntefli á síðustu leiktíð.

„Þetta verður ágætis prófraun fyrir bæði lið. Ég held að flestir séu búnir að sjá það fyrir að þessi lið komi til með að berjast um titilinn,“ sagði Harpa Þorsteinsdóttir, fyrrverandi landsliðskona í knattspyrnu, í samtali við DV í dag fyrir leikinn.

Breiðablikskonur voru mun sterkari í kvöld en markalaust var þó í fyrri hálfleik. Breiðablik voru fljótar að brjóta ísinn þegar seinni hálfleikur hófst en Sveindís Jónsdóttir kom Blikunum yfir þegar ein mínúta var liðin af seinni hálfleik. Sveindís var síðan fljót að setja annað mark í net Valsara en einungis einni mínútu eftir fyrsta markið skoraði hún annað mark. Ljóst var að Sveindís var ekki orðin södd því á 77. mínútu kom hún Breiðablik í 3-0.  Tíu mínútum síðar skoraði Berglind Þorvaldsdóttir fjórða mark Blika í kvöld og endaði leikurinn 4-0 fyrir Breiðablik.