Gylfi Þór Sigurðsson og félagar hans í Everton hafa hafið æfingar á nýjan leik eftir útgöngubann í Bretlandi. Gylfi og félagar voru heima hjá sér í átta vikur.

Gylfi ræðir stöðu mála við heimasíðu Everton og hvernig eiginkona hans Alexandra Helga Ívarsdóttir sparkar í rass hans þegar það á við.

„Alexandra er með mér 24/7 og hún þolir mig þegar við töpum og hlutirnir ganga ekki vel. Hún ýtir við mér á hverjum degi,“ sagði Gylfi.

„Metnaðurinn kemur líka frá mér, ég hef metnað til að bæta mig og spila á meðal þeirra bestu áfram.“

Gylfi segir að líkami sinn sé í toppstandi þrátt fyrir að verða 31 árs á þessu ári. „Líkami minn er í góðu standi, það er erfitt að segja hversu mörg ár ég á eftir. Mér líður betur en þegar ég var tvítugur.“

„Það er gaman að vera byrjaður að æfa aftur og sjá andlit leikmanna, það er langt á milli okkar en það er gott að æfa með einhverjum.“