Gylfi Dalmann Aðalsteinsson, formaður KR segir ekkert að í fjármálum KR og kveðst ekki vita til þess að knattspyrnudeild félagsins standi höllum fæti. Þetta kemur fram í Fréttablaðinu.
Síðustu daga hefur verið rætt um það að knattspyrnudeild KR sé í rekstrarvanda, þetta hefur meðal annars komið fram í hlaðvarpsþættinum Dr. Football. Þá sýndi skýrsla Reykjavíkurborgar að félagið í heild skuldaði 200 milljónir árið 2018.
„Það er ekkert að fjármálum KR og ég skil ekki alveg hvernig þessi umræða verður til,“ segir Gylfi Dalmann Aðalsteinsson, formaður KR við Fréttablaðið.
Gylfi kveðst ekki vita til þess að knattspyrnudeildin sé í vanda stödd þó hann sitji ekki fundi þar. „Ég hef ekki heyrt þessa umræðu. Auðvitað eru mörg félög og margar deildir í varnarbaráttu þessa stundina en aðalstjórn KR stendur mjög vel og þar með félagið allt.“
„KR er Íslandsmeistari í fót- og körfubolta og stóð sig vel kvenna megin í sömu greinum. Við erum með frábærar deildir. Þetta er trúlega 10-90 reglan. Ef 10 prósent gengur ekki vel þá fara 90 prósent af tímanum að ræða það.“ –