Hjörvar Hafliðason heldur því fram að Heimir Hallgrímsson, þjálfari Al-Arabi í Katar sé með 1,8 milljón dollara í árslaun. Þetta kom fram í hlaðvarpsþætti Hjörvars, Dr. Football.
Hjörvar kvaðst hafa rætt málið við umboðsmann sem sagði þetta vera árslaun Heimis í Katar.
Ef satt er þá þénar Heimir 262 milljónir íslenskra króna á ári hverju fyrir starf sitt í Katar. Aron Einar Gunnarsson leikur undir hans stjórn, Hjörvar sagði að Aron væri með lægri laun.
Heimir fékk starfið í Katar undir lok árs 2018 eftir magnað starf með íslenska landsliðið í sjö ár.
Aðeins Gylfi Þór Sigurðsson, Jóhann Berg Guðmundsson og Birkir Bjarnason þénuðu meira af íslenskum fótboltamönnum á síðasta ári. Gylfi var í sérflokki með 750 milljónir í árslaun samkvæmt Viðskiptablaðinu.