Manchester United ætlar sér ekki að nýta úrræði stjórnvalda og setja starfsfólk sitt á bætur, þetta kemur fram í enskum blöðum.

Mikið hefur verið rætt og ritað um þá ákvörðun Liverpool að setja allt starfsfólk sitt á atvinnuleysisbætur, þannig borgar ríkið 80 prósent af tekjum fólksins en Liverpool borgar 20 prósent.

Þessi ákvörðun Liverpool hefur verið harðlega gagnrýnd, enda félagið vel rekið og hagnaðist verulega á síðasta ári.

Stuðningsmenn Liverpool eru ósáttir með félagið að nýta sér þetta, enda er þetta úrræði fyrir fyrirtæki í neyð. Liverpool hagnaðist um rúmar 40 milljónir punda á síðasta ári.

Bournemouth, Newcastle, Norwich og Tottenham hafa nýtt sér þetta úrræði en það eru eigendur Liverpool, sem tóku ákvörðun um þetta.