Birkir Bjarnason, leikmaður Brescia á Ítalíu hefur þurft að hanga heima hjá sér síðustu vikur á meðan útgöngubann er í gangi. Þetta kom fram í viðtali við hann á RÚV.is.

Birkir hafði ætlað sér að fara heim til Íslands á meðan ástandið er sem verst en Brescia bannaði honum að ferðast. Lögreglan á Ítalíu tekur hart á öllu þessa dagana.

„Sumir dagir eru erfiðari en aðrir, þetta búinn að vera langur tími, komið upp í fjórar vikur núna sem maður er búinn að vera svolítið fastur inni hjá sér og ekki mikið að fara út. Fyrstu vikurnar var þetta aðeins frjálslegra og maður reyndi að fara aðeins út í göngutúra, setjast á bekk og lesa aðeins og fá sér smá ferskt loft. En það er ekki vel séð hér á Ítalíu, maður er bara skikkaður inn ef maður er mikið úti.“ segir Birkir við RÚV.

Birkir settist fyrir utan húsið sitt á dögunum en lögreglan var ekki lengi að mæta á svæðið. „Löggan stoppaði og skipaði mér inn. Það er ekkert annað hægt en að hlýða því og gera það.“

Birkir er ekki langt frá því svæði á Ítalíu sem hefur farið verst út úr kórónveirunni.

„Ég er náttúrulega bara hálftíma frá Bergamo þar sem þetta er allra verst og ég var að heyra núna um daginn að Brescia er bær númer tvö yfir flesta látna og flesta smitaða. Þannig að ég er svo sem í versta hlutanum af Ítalíu.“