Liverpool er hætt við að setja almennt starfsfólk félagsins á bætur hjá ríkinu. Þetta kemur fram í yfirlýsingu félagsins.
Liverpool sendi frá sér yfirlýsingu á laugardag þar sem greint var frá því að allt almennt starfsfólk félagsins, færi á bætur hjá ríkinu á meðan kórónuveiran væri í gangi. Félagið ætlaði að borga 20 prósent en ætlaði að láta ríkið borga 80 prósent af launum starfsmanna.
Fékk þessi ákvörðun hörð viðbrögð, stuðningsmenn félagsins voru hneykslaðir og beindust öll spjót að John W Henry eiganda félagsins.
Liverpool er vel rekið félag og á mikla fjármuni, úrræði hjá ríkisstjórn Bretlands var hugsað fyrir minna og illa stæð fyrirtæki.
Liverpool sagði í yfirlýsingu að málið hafi ekki verið hugsað alla leið og nú hefði verið ákveðið að draga í land, félagið myndi greiða starfsfólki full laun.