Samkvæmt hlaðvarpsþættinum Dr. Football var um 50 milljóna króna tap á rekstri KSÍ árið 2019. Sagt er að ársreikningur verði birtur í dag á vef sambandsins.

Árið 2018 var hagnaður sambandsins yfir 200 milljónir og árið 2017 var hagnaður ársins rúmar 200 þúsund krónur. Hagnaðurinn árið 2018 var fyrst og síðast vegna HM, karla þar sem Ísland var með í fyrsta sinn. Gríðarlegar tekjur koma af stórmóti karla.

,,Ég náði að glugga í þennan reikning, mér brá. Það var tap á rekstri sambandsins árið 2019, í kringum 50 milljónir. Mér finnst það skellur,“ sagði Kristján Óli.

Ekki var útskýrt hvar hallinn á rekstrinum væri en öll undankeppni EM karla var í fyrsta sinn leikin á sama árinu, þar var mikill kostnaður sem iðulega hefur farið á tvö ár.

Knattspyrnusambandið er þó vel statt og átti um 759 milljónir í óráðstafað eigið fé undir lok árs 2018.