Arnar Gunnlaugsson þjálfari Víkings mun skoða það hvort félagið geti fengið Kolbein Sigþórsson markahæsta leikmann í sögu íslenska landsliðsins til félagsins.
Kolbeinn sem er þrítugur hefur rift samningi sínum við AIK í Svíþjóð en báðir aðilar komust að slíku samkomulagi. Kolbeinn ólst upp í Víkinni.
„Ég mun klárlega heyra í honum, fyrst og fremst svekkjandi hvernig ferill hans hefur þróast. Maður óskar þess heitt og innilega að hvað sem hann gerir, að hann finni ánægjuna og verði heill,“ sagði Arnar á fréttamannafundi í Víkinni í dag eftir að Kári Árnason og Þórður Ingason höfðu framlengt samninga sína við félagið.
Kolbeinn hefur glímt við talsvert af meiðslum síðustu ár og óvíst er hvaða skref hann tekur á ferlinum.
„70 prósent Kolbeinn Sigþórsson er mjög góður fyrir íslenska landsliðið, ef hann ákveður að koma heim þá krefjumst við þess að hann tali við okkur.“
„Við heyrum í honum, kannski tekur maður kaffibolla með honum þegar hann kemur heim. Kolbeinn á nóg eftir, hann er þrítugur. Það er enginn aldur, hans leikstíll hefur ekki byggst upp á hraða. Djöfull væri gaman að sjá hann í Víkinni, ég neita því ekki.“
Viðtalið við Arnar er í heild hér að neðan.