Arnar Þór Viðarsson var fyrr í vikunni ráðinn landsliðsþjálfari karlalandsliðsins í knattspyrnu. Honum til aðstoðar verður Eiður Smári Guðjohnsen og svo er einnig unnið að því að fá Lars Lagerback inn í þjálfarateymið.

Lagerback er atvinnulaus eftir að Noregur rak hann úr starfi en hann vildi ekki taka að sér fullt starf sem landsliðsþjálfari. Arnar Þór hefur áhuga á að fá hann inn sem ráðgjafa og munu þeir funda á nýju ári.

Hjörvar Hafliðason ræddi þessa hugmynd á Bylgjunni fyrr í vikunni og virðist lítt hrifin af því að fá Lagerback aftur til starfa á Íslandi. „Það er eins og ef Reykjavík síðdegis gengur illa eftir fimm ár, þá munið þið hringja í Þorgeir Ástvalds og biðja hann um að koma aftur. hvort hann geti verið á mánudögum,“ sagði Hjörvar í þættinum Reykjavík síðdegis.

Hjörvar er ekki spenntur fyrir því að fá Lagerback hingað heim eftir frábært starf frá 2012 til 2016. „Ég er ekki hrifin af svona, ef það gengur vel þá verður Lars æðislegur. Ef það gengur illa þá er þjálfarinn (Arnar Þór) hálfviti, hvernig vilja menn hafa þetta? Þetta er einhver þrá, hann er vinsæll eftir að hafa gert frábæra hluti hérna.“

Hjörvar telur að stjórn KSÍ og Guðni Bergsson hafi fyrir löngu verið búin að ákveða að ráða Arnar Þór, þó rætt hafi verið við fleiri þjálfara. „Ég held að Guðni hafi meira verið að taka samtalið til að taka samtalið, hann hafi allan tímann verið búinn að ákveða þetta,“

Sven Göran-Eriksson fyrrum þjálfari enska landsliðsins hafði mikinn áhuga á starfinu sakvæmt Hjörvari. „Ég er með það eins nálægt Knattspyrnusambandinu og hægt er,“ sagði Hjörvar á Bylgjunni en viðtalið má heyra í heild hér að neðan.