Stjarnan hefur selt einn sinn besta leikmann, Alex Þór Hauksson til Öster í Svíþjóð. Þetta kemur fram á vef félagsins.

Öster leikur í næst efstu deild í Svíþjóð og endaði í fjórða sæti deildarinnar á síðustu leiktíð.

„Við vissum að Alex hefur haft metnað til þess að stíga skrefið út og núna þegar tækifærið gafst vildum við styðja við bakið á honum til að þróa sinn leik enn frekar. Við óskum Alex innilega til hamingju og munum fylgjast stolt með honum á komandi árum og vitum að hann mun einn góðan veðurdag snúa til baka í bláa búninginn,“ sagði Helgi Hrannarr Jónsson formaður MFL ráðs karla

Þrátt fyrir að vera 21 árs hefur Alex spilað tæpa 100 leiki í deild og bikar með Stjörnunni og verið jafn besti leikmaður liðsins síðustu ár.

„Eftir fjögur góð tímabil fyrir framan bestu stuðningsmenn landsins er ég mjög þakklátur að hafa fengið að taka þátt í fullt af stórum leikjum og vinna bikarmeistaratitill sem og að kynnast öllu því góða fólki sem er innan Stjörnunnar. Það hefur verið mikill heiður að fá að vera fyrirliði liðsins en ég hef ákveðið að það sé kominn tími á nýja áskorun hjá mér og hlakka ég til að taka við nýju hlutverki sem fulltrúi Stjörnunnar á erlendri grundu. Takk fyrir mig kæra Stjörnufólk og ég hlakka til að fá að setja bláu treyjuna aftur á mig,“ sagði Alex við félagsins.