Sara Björk Gunnarsdóttir hefur átt magnað ár á knattspyrnuvellinum, hún vann alla titlana með Wolfsburg í Þýskalandi, Meistardeildina með Lyon og fór með íslenska landsliðinu inn á Evrópumótið.

Sara Björk varð íþróttamaður ársins á síðasta ári hér á landi og er til alls líkleg í kjörinu á þessu ári.

„Þetta er búið að vera alveg ótrúlegt ár. Þetta er búið að vera ótrúlega krefjandi og skemmtilegt. Mikið af hindrunum líka á leiðinni, en ég held ég hafi sett mér það hugarfar að reyna að gera það besta úr aðstæðum,“ sagði Sara í samtali við RÚV.

Þrátt fyrir þetta magnaða ár hefur Sara Björk eins og aðrir íþróttamenn upplifað öðruvísi tíma vegna COVID-19 veirunnar.

„Ég man að ég var heima í mars og það var ótrúlega mikil óvissa, ég hafði ekki hugmynd um hvort ég væri að fara að spila, ná að spila mitt síðasta tímabil með Wolfsburg. Það var óvissa um hvort deildin yrði áfram, en svo á endanum leystist það allt saman og ég er ótrúlega þakklát fyrir það, að það hafi svo margt gengið upp á þessu ári. En auðvitað það sem stendur upp úr fótboltalega séð er, ég verða að segja að hafa unnið Meistaradeildina.“ Sara segir að hún hafi haft þann draum í tíu ár að vinna Meistaradeildina og það hafi verið mikill sigur fyrir hana. Hún minntist svo að sjálfsögðu á afrek íslenska kvennalandsliðsins þar sem hún er í lykilhlutverki.

„Svo var náttúrulega líka að við stelpurnar í landsliðinu höfum náð að tryggja okkur í fjórða sinn í röð á EM. Það er ákveðið afrek og maður er stoltur af því.“