„Mig langar að byrja á því að þakka Jóni Þór fyrir samstarfið síðastliðin 2 ár. Mín skoðun er sú að hann er flottur þjálfari með mikla ástríðu fyrir leiknum og hef ég ekkert nema góða hluti um okkar tíma í landsliðinu að segja,“ það er svona sem Hallbera Guðný Gísladóttir landsliðskona hefur stuttan pistill sinn á Facebook síðu sinni þar sem hún fer yfir atburði síðustu daga í kringum kvennalandsliðið.

Eftir að Ísland tryggði sér sæti á Evrópumótið í síðustu viku hefur Jón Þór Hauksson sagt starfi sínu lausu em landsliðsþjálfari. Jón Þór steig til hliðar eftir uppákomu í fögnuði landsliðsins þar sem hann er sagður hafa farið yfir strikið.

Mikið hefur verið fjallað um málið og hefur komið til tals að stelpurnar hafi lagst á eitt til að losna við Jón Þór úr starfi, Hallbera þvertekur fyrir það. „Það hryggir mig hinsvegar að sjá fólk taka undir og deila skoðunum sem snúa að því að um samantekin ráð okkar leikmanna hafi verið að ræða til þess að hrekja þjálfarann frá störfum. Ég get ekki setið undir slíkum ásökunum enda eru þær fjarri sannleikanum,“ skrifar Hallbera.

Hallbera segir það standa upp úr að liðið sé nú komið inn á Evrópumótið. „Eftir situr að landsliðið náði frábærum árangri og tryggði sér sæti á EM 2022. Við munum halda áfram að leggja hart að okkur svo liðið geti byggt ofan á þann árangur og þá góðu vinnu sem hefur verið unnin.“

Landsliðið sendi frá sér yfirlýsingu í fyrradag og þar stóð. „Eftir leik Íslands og Ungverjalands um daginn varð ljóst að við tryggðum okkur sæti á EM 2022. Við fögnuðum því enda virkilega ánægðar með að hafa náð okkar markmiðum. Sama kvöld átti sér stað óásættanleg hegðun Jóns Þórs aðalþjálfara liðsins gagnvart hluta leikmannahópsins. Þar átti hann persónuleg samtöl við leikmenn um önnur mál en fótbolta sem valdið hafa trúnaðarbresti milli hans og leikmanna liðsins,“ segir í yfirlýsingu liðsins.