Vandræði Arsenal í ensku úrvalsdeildinni héldu áfram í kvöld er liðið tapaði 1-2 fyrir Wolves á heimavelli í 10. umferð ensku úrvalsdeildarinnar.
Leikurinn byrjaði á óhugnalegan hátt þegar David Luiz og Raul Jimenez skullu saman í vítateig Wolves á 5.mínútu. Leikurinn var stöðvaður í um það bil tíu mínútur og Jimenez fluttur meðvitundarlaus á sjúkrahús. Það hefur nú verið staðfest að hann er kominn með meðvitund og bregst vel við meðferð á sjúkrahúsinu.
Pedro Neto kom Wolves yfir á 27. mínútu. Leikmenn Arsenal voru hins vegar fljótir að svara fyrir sig því þremur mínútum síðar jafnaði Gabriel leikinn með skallamarki eftir hornspyrnu Willian.
Á 42. mínútu kom Daniel Podence gestunum hins vegar aftur yfir.
Leikmenn Arsenal sóttu án afláts að marki Wolves það sem eftir lifði leiks en náðu ekki að finna leiðina framhjá varnarmönnum Wolves og að jöfnunarmarki.
Arsenal er eftir leikinn í 14. sæti deildarinnar með 13 stig. Wolves fara með sigrinum upp í 6. sæti þar sem þeir eru með 17 stig.
Arsenal 1 – 2 Wolves
0-1 Pedro Neto (’27)
1-1 Gabriel (’30)
1-2 Daniel Podence (’42)